بنات آخر زمن

بنات آخر زمن

الساعة 4:28 مساءً
- ‎فيكتابنا
1010
7
طباعة
بسام فتيني

  ......       

كانت ستي فتو قاعدة في العصرية تقرمش كربو وجنبها الفشار وكاسة الشاي في فنجان (أبو أدن)، وفجأة الحُرمة عطشت فصارت تنادي بأعلى صوتها على بنتها زينب عشان تجبلها كاسة موية, جات زينب تجري وتقول أيش تبي يا ماما, قالت لها جيبيلي شوية زمزم في الكاسة التوتوة يا بت, راحت زينب تجيب الموية، وفي الطريق جالها برودكاست عالبلاك بيري ونسيت أمها وقعدت تطزطز في الجوال وتوزع المنشور وما انتبهت إلا بعد صرخة تانية من أمها وهي تزعق بأعلى صوت: فين الموية يا هانم, جريت زينب تجيب الموية ولما وصلت لأمها قالت لها أيشبك اتأخرتي ريقي نشف الله ينشف ريق جوزك، فقالت لها هرجة البرودكاست، وكالعادة ضربت فتو على صدرها وه يا ندامة أيش البرودكاست دا، ومن أيش جاكي لا يكون عدوى من بنات خالاتك – وعلى بالها مرض معدٍ المسكينة – سطحت زينب من الضحك وقالت لها يا ماما دي حاجات ما تعرفيلها خليكي في تلفون أبو هندل, اتنهدت ستي فتو وقالت لها تعالي يا بنتي جنبي واسمعي كلامي، ترى لا تخلي الحاجات الجديدة دي تنسيكي رضا أمك، ومن جد إنتو بنات آخر زمن، لأني لما كنت في سنك كنت أطبخ وأنفخ ومو فاضية أبربر مع فلانة ولا أدردش مع علانة, إتعلمي يا بنتي كيف تكوني ست بيت أول وبعدين دوري باقي الحاجات، ترى الحُرمة أولوياتها لبيتها ولعيالها ولجوزها، انتبهي لحياتك لا تعنسي وتترمي جنبي و(أوحل فيكي). سلمت زينب على رأس أمها وقالت لها سامحيني يا ماما مو قصدي، بس الله يخليكي لا عاد تقولي الكلام الكبير دا وإنتي حاطة زيت على راسك ترى انكتمت لما بُست راسك. ضحكت فتو الين بانت سنونها الدهب وقالت: من جد بنات آخر زمن.


قد يعجبك ايضاً

#عاجل .. القتل لـ 15 مداناً بخلية التجسس لـ #إيران

المواطن – الرياض أصدرت المحكمة الجزائية المتخصصة اليوم