تفاصيل جديدة واعترافات مثيرة لسارق فيلا محمد صلاح

أدلى سارق فيلا نجم مصر وليفربول الإنجليزي محمد صلاح باعترافات تفصيلية ومثيرة عن عملية السرقة، وما تم سرقته، والأسباب التي دفعته لارتكاب جريمته.

سرقة فيلا محمد صلاح

ووفقًا لنص تحقيقات واعترافات المتهمين بسرقة فيلا محمد صلاح في القضية رقم 4262 لسنة 2023 جنح التجمع الأول، جاءت اعترافات المتهم الأول بسرقة فيلا محمد صلاح اللاعب الدولي كالآتي: اللي حصل إن أنا كنت شغال هناك من سنتين وبقالي سنة ونص ماشي، وكنت مسؤول عن 10 فيلل منهم فيلا محمد صلاح، وتعثرت ماديًا بسبب انفصال بدون طلاق بين والدي ووالدتي بسبب مشاكل، وبعد كده والدتي راحت قعدت في مكان إيجار، وأنا اللي كنت بدفع الإيجار وبساعدها في المصاريف، وكنت شغال في شركة ومشيت منها من شهر، وفكرت إني أسرق فيلا محمد صلاح وأنا كنت عارف إن هو بييجي الفيلا لما بيكون فيه ماتشات للمنتخب.

قد يهمّك أيضاً

استولوا على 2.8 مليون ريال.. القبض على محتالي سبائك الذهب المزيّف بمكة

في قبضة الأمن.. عصابة الاحتيال والاعتداء والسلب بالرياض

وتابع المتهم الأول في قضية سرقة اللاعب الدولي محمد صلاح: أنا كنت عارف إن الباب الخلفي مكسور وبيتقفل بسيخ حديد فكلمت عادل صاحبي وقولت له على الفكرة قالي والكاميرات قولتله إن الفيلا مفيهاش حد قالي لا أنا مش جاي وبعدها بيومين لقيته بيكلمني بالليل وقالي أنا هاجي معاك نسرق الفيلا، وقلتله خلاص نتقابل بكرة الصبح وفعلا اتقابلنا تاني يوم الصبح الساعة 11.

وأقر المتهم بسرقة فيلا محمد صلاح: رحت أنا وهو على شارع مصر بالإسماعيلية عشان نبيع التليفون بتاعى عشان مكنش معانا فلوس المواصلات وبعت التليفون بتاعي بألف جنيه، ورحنا على الموقف وركبنا عربية السلام واتحركنا من إسماعيلية، ووصلنا السلام حوالي الساعة 4 مساء واتغدينا وقعدنا على القهوة شوية، وبعد كده ركبنا من السلام لمدينتي ووصلنا حوالي الساعة 7.00 مساء عند بوابة 1 مدينتي وفضلنا واقفين لحد ما باص مدينتي جه وركبنا الباص ووصلنا منطقه الفلل اللي فيها فيلا محمد صلاح، ونزلنا هناك وقعدنا شوية في الخلفيات اللي هي الجناين اللي خلف الفيلا عشان نشوف إن مفيش أمن بيعدي.

وأشار المتهم الأول: بعد ما اتأكدنا إن مفيش حد معدي رحت أنا الأول على الباب الخلفي بتاع الفيلا عشان أشوفه فلقيته متصلح، فعادل المتهم الثاني في القضية جه ورايا فقالي هنعمل إيه قولت له هنط من على الباب الخلفى والباب فعلا قصير فأنا نطيت فلقيت نور الفيلا منور من جوه فأنا استخبيت في الشجر اللي موجود في الجنينة وبعدها بدقيقة عادل نط وجه ورايا واستخبينا.

وبعد تنفيذ عملية سرقة الفيلا قال المتهم: رحت على البيت عند عادل وفضلت عنده لحد الصبح وبعد كده سبت المسروقات عنده وخدت أنا الـ 3 جزم ورحت على البيت عندي عشان أبو عادل ميشكش فيه إنه سرقهم، وعادل خد باقي الحاجة ومعرفش هو عمل فيهم إيه عشان أنا مكنش معايا تليفون أتواصل معاه، وامبارح حوالي الساعة 3 الفجر لقيت الحكومة جات لي البيت وخدوني وقالولي فين الحاجة اللي انت سرقتها من عند محمد صلاح قلت لهم في الدولاب فتحوا الدولاب لقو 3 جزم وخدوني ونزلوني وأول ما نزلت معهم لقيت عادل معاهم، وراحوا مع عادل على البيت عنده جبلهم الميدالية وكان فاضل الخمس ريسيفرات والكريستالة قالهم أنا شايل الشنطه عند محمد أبو عزه صاحب عادل فخدهم راحو على محمد وعادل خدوهم وطلعوا عند محمد ملقوش في الشطنه غير اتنين ريسيفر وكريستالة ولما سألوه على الثلاثة رسيفرات عادل قالهم بعتهم لواحد فعادل خدهم على هناك جابوا الثلاثة رسيفرات كان عادل بايعهم له بـ 300 جنيه وبعد كده جابونا على قسم التجمع الأول وهو ده اللى حصل.

يذكر أن وزارة الداخلية كشفت في وقت معاصر لواقعة السرقة تفاصيل ضبط مباحث القاهرة لـ مرتكبي واقعة سرقة فيلل محمد صلاح.